Mark 14

Iqhinga lokumbulala uJesu

1Kwathi emva kwensuku ezimbili kwaba khona iphasika lomkhosi wesinkwa esingelamvubelo; abapristi abakhulu lababhali basebedinga ukuthi bangambamba njani ngobuqili bambulale; 2kodwa bathi: Kungabi ngomkhosi, hlezi kube lesiphithiphithi sabantu ^a.

UJesu uyagcotshwa eBethani

3Kwathi eseBethani, endlini kaSimoni umlephero, ehlezi ekudleni, kwafika owesifazana ephethe umfuma we-alibasta* wamagcobo awenadi* uqobo aligugu elikhulu; wasephahlaza umfuma we-alibasta, wawathela ekhanda lakhe. 4Kwakukhona abanye abathukuthelayo ngaphakathi kwabo, besithi: Kwenzelwani ukumotshwa kwalamagcobo? 5Ngoba la abengathengiswa ngemali edlula odenariyo* abangamakhulu amathathu, besekunikwa abayanga. Basebemsola. 6Kodwa uJesu wathi: Myekeleni; limhluphelani? Wenze umsebenzi omuhle kimi. 7Ngoba abayanga lihlala lilabo, futhi uba lithanda lingabenzela okuhle; kodwa mina kalihlali lilami ^b. 8Yena wenzile abengakwenza; uqalile ngaphambili ukuwugcobela ukungcwatshwa umzimba wami ^c. 9Ngiqinisile ngithi kini: Loba ngaphi emhlabeni wonke lapho okuzatshunyayelwa khona lelivangeli, lalokhu akwenzileyo kuzakhulunywa ngakho kube yisikhumbuzo ngaye.

Umvuzo wokumnikela uJesu

10UJudasi Iskariyothi, omunye wabalitshumi lambili, wasesiya kubapristi abakhulu, ukuze amnikele kubo ^d. 11Futhi sebezwile bathokoza, bathembisa ukumnika imali; wasedinga ukuthi angamnikela njani kuhle ^e.

Ukumiswa kwesidlo esingcwele

12Kwathi ngosuku lokuqala lwesinkwa esingelamvubelo, ababehlaba ngalo iphasika, abafundi bakhe bathi kuye: Uthanda ukuthi siyelungisa ngaphi ukuze udle iphasika ^f? 13Wasethuma ababili kubafundi bakhe ^g, wathi kubo: Hambani liye emzini, njalo umuntu uzahlangana lani ethwele imbiza yamanzi; limlandele, 14njalo loba kungaphi azangena khona, kalibokuthi kumninindlu: UMfundisi uthi: Ingaphi indlu yezihambi, lapho engingadlela khona iphasika labafundi bami ^h? 15Futhi yena uzalitshengisa indlu enkulu ephezulu eyendlelweyo elungisiweyo; silungiseleni khona. 16Abafundi bakhe basebephuma, bangena emzini, bathola kunjengokutsho kwakhe kubo; basebelungisa iphasika.

17Kwathi sekukusihlwa wafika labalitshumi lambili. 18Sebehlezi besidla, uJesu wathi: Ngiqinisile ngithi kini: Omunye wenu, odla lami, uzanginikela ⁱ. 19Basebeqala ukudabuka, bathi kuye ngamunye ngamunye: Ayisimi, akunjalo yini? Lomunye: Ayisimi, akunjalo yini ^j? 20Kodwa waphendula wathi kubo: Ngomunye wabalitshumi lambili, otsheba kanye lami emganwini. 21Sibili iNdodana yomuntu ihamba, njengokulotshiweyo ngayo; kodwa maye kulowomuntu enikelwa nguye iNdodana yomuntu! Bekungakuhle kuye aluba lowomuntu wayengazalwanga.

22Kwathi besidla, uJesu wathatha isinkwa, wasibusisa wasihlephula, wabanika, wathi: Thathani, lidle; lokhu kungumzimba wami. 23Wasethatha inkezo, esebongile wabanika; basebenatha kuyo bonke. 24Wasesithi kubo: Leli ligazi lami, elesivumelwano esitsha, elichithelwa abanengi ^k. 25Ngiqinisile ngithi kini: Angisayikunatha okwesithelo sevini, kuze kufike lolosuku engizasinatha ngalo sisitsha embusweni kaNkulunkulu. 26Kwathi sebehlabele ingoma yokudumisa baphuma baya entabeni yeMihlwathi.

Ukuxwayiswa kukaPetro

27UJesu wasesithi kubo: Lonke lizakhubeka ngami ngalobubusuku; ngoba kulotshiwe ukuthi: Ngizatshaya umelusi, izimvu besezihlakazeka ^l. 28Kodwa emva kokuvuswa kwami, ngizalandulela ukuya eGalili. 29Kodwa uPetro wathi kuye: Lanxa bonke bezakhubeka, kodwa hatshi mina ^m. 30UJesu wasesithi kuye: Ngiqinisile ngithi kuwe: Lamuhla ngalobubusuku, lingakakhali kabili iqhude, uzangiphika kathathu ⁿ. 31Kodwa waqinisa ngamandla esithi: Loba kudingeka ngife lawe, angisoze ngikuphike. Basebesitsho njalo labo bonke.

EGetsemane

32Basebefika endaweni ebizo layo yiGetsemane; wasesithi kubafundi bakhe: Hlalani phansi lapha, ngisayakhuleka ^o. 33Wasethatha kanye laye uPetro loJakobe loJohane, waseqala ukudatshulwa sibili lokukhathazeka kakhulu. 34Wasesithi kubo: Umphefumulo wami udabukile kakhulu kuze kube sekufeni; hlalani lapha lilinde ^p. 35Waseqhubeka ibangana, wawela emhlabathini, wakhuleka ukuthi, uba kungenzeka, kudlule kuye lelihola ^q. 36Wasesithi: Abha*, Baba ^r, zonke izinto ziyenzeka kuwe. Susa linkezo kimi ^s; kodwa kungabi yikuthi ngithandani mina, kodwa kube yikuthi uthandani wena ^t. 37Wasesiza, wabafica belele, wathi kuPetro: Simoni, ulele yini? Ubungelinde yini ihola libe linye? 38Lindani likhuleke, ukuze lingangeni ekulingweni. Umoya uyavuma-ke, kodwa inyama ibuthakathaka. 39Wasebuya wahamba wayakhuleka, esitsho wona lawomazwi ^u. 40Wasebuya wabafica futhi belele; ngoba amehlo abo ayenzima, kodwa babengazi ukuthi bazamphendula bathini ^v. 41Wasesiza ngokwesithathu, wathi kubo: Qhubekani-ke lilele, liphumule. Kwanele; ihola selifikile; khangelani, iNdodana yomuntu iyanikelwa ezandleni zezoni. 42Sukumani, sihambe; khangelani, onginikelayo useduze ^w.

Ukubotshwa kukaJesu lokuthethwa kwecala lakhe

43Kwathi esakhuluma, wahle wafika uJudasi, omunye wabalitshumi lambili, njalo elexuku elikhulu elilezinkemba lezinduku, livela kubapristi abakhulu lababhali labadala. 44Lomnikelayo wayebanike isiboniso, esithi: Lowo engizamanga, nguye; limbambe, limqhube limqinise. 45Esefikile, wahle wasondela kuye wathi: Rabi*, Rabi! Wasemanga. 46Basebemdumela, bambamba. 47Lomunye kwababemi khona wakhokha inkemba wagadla inceku yompristi omkhulu, waquma indlebe yayo.

48UJesu wasephendula wathi kubo: Liphume njengokuyamelana lomphangi yini lilezinkemba lezinduku ukuzangibamba? 49Bengilani insuku ngensuku ethempelini ngifundisa, kodwa kalingibambanga - kodwa ukuze kugcwaliseke imibhalo ^x. 50Bonke basebemtshiya babaleka. 51Lejaha elithile lamlandela, lembethe ilembu elicolekileyo emzimbeni onqunu. Aselibamba amajaha ^y; 52laselitshiya ilembu elicolekileyo lababalekela linqunu.

UJesu uphambi kompristi omkhulu

53Basebemqhuba uJesu bamusa kumpristi omkhulu; basebebuthana kuye abapristi abakhulu bonke labadala lababhali ^z. 54UPetro wasemlandela ekhatshana waze waba phakathi kweguma lompristi omkhulu; wayehlezi kanye lezinceku, esotha umlilo ^aa.

55Labapristi abakhulu lomphakathi wonke badinga ubufakazi ngoJesu, ukuze bambulale; kodwa kababutholanga. 56Ngoba abanengi bafakaza amanga ngaye, kodwa lobubufakazi kabuvumelananga ^ab. 57Kwasekusukuma abanye bafakaza amanga amelana laye besithi: 58Thina samuzwa esithi: Mina ngizadiliza lelithempeli ^ac elenziwe ngezandla ^ad, njalo ngakhe elinye elingenziwanga ngezandla ^ae ngensuku ezintathu. 59Loba kunjalo ubufakazi babo kabuvumelananga ^af. 60Kwasekusukuma umpristi omkhulu phakathi kwabo wambuza uJesu, esithi: Kawuphenduli lutho yini? Bafakazani laba okumelana lawe? 61Kodwa wathula, kaphendulanga lutho. Umpristi omkhulu wabuya wambuza, wathi kuye: Wena unguKristu, iNdodana yoBusisiweyo yini? 62UJesu wasesithi: Mina nginguye. Njalo lizabona iNdodana yomuntu ihlezi ngakwesokunene samandla, isiza ngamayezi ezulu ^ag. 63Umpristi omkhulu wasedabula izembatho zakhe wathi: Sisaswelelani abafakazi? 64Liyizwile inhlamba; licabangani? Bonke basebemlahla ukuthi ulecala lokufa.

65Abanye basebeqala ukumkhafulela amathe, lokumgubuzela ubuso, lokumdutshuza ^ah, lokuthi kuye: Profetha ^ai! Izinceku zasezimwakala ^aj.

UPetro ulandula uJesu

66UPetro esegumeni ngaphansi ^ak, kwafika enye yezincekukazi zompristi omkhulu ^al; 67isibona uPetro esotha, yamkhangela yathi: Lawe ubulomNazaretha, uJesu ^am. 68Kodwa waphika, wathi: Kangikwazi, futhi kangikuqedisisi okutshoyo. Wasephuma phandle, waya entubeni; laselikhala iqhude ^an.

69Njalo incekukazi encane yabuya yambona, yaqala ukutsho kwababemi khona ukuthi: Lo ungomunye wabo ^ao. 70Kodwa wabuya waphika. Kwathi emva kwesikhatshana futhi labo ababemi khona bathi kuPetro: Ngeqiniso ungomunye wabo; ngoba lawe ungumGalili ^ap, lolimi lwakho luyavumelana ^aq. 71Waseqala ukuqalekisa lokufunga esithi: Kangimazi lumuntu elimtshoyo. 72Iqhude laselikhala ngokwesibili. UPetro wasekhumbula ilizwi uJesu ayelitshilo kuye lokuthi: Lingakakhali kabili iqhude, uzangiphika kathathu ^ar. Esenakane ngalokhu wakhala.